Editorial : Kan hmalakna Thahnemngaih thil vang liau liauvin hei, kum engemaw zat chu Chanchintha thehdarhna kawngah leh kohhrante hmalakna inhrilh hriat tawnna atan, tiin Aizawl East District PYD chuan kan chanchinbu PYD AW chu kan la chhuah ve tang tang a. Thu leh hla lama tuimite leh kan bengvarna tura Chanchinthar/Hmalakna rawn thehluttute thahnemngaihna azarah a la kal ve thei a ni ber e. Chanchinbu ruangam- a chhung thu leh kawm te chu sum a awm chuan nalh leh mawi tak takin a tih theih zel a. A enkawltute tan pawh mut mawh hnarmawha han neih tham teh vak pawh ni lovin, Pathian zarah a la chhuak ve zel thei chuan a rinawm a. Sawiseltute leh faktu hrang hrangte hnen atangin hmasawnna kawng pawh thui tak kan zawh mekin kan hria. Hetih lai hian thawktute beiseina ang erawh (duhthawh thil pawh a ni mahna le) kan la phak chiah lohna a la awm! Bial leh Tualchhunga Thalai hruaitute, a bikin President/Secretary te hian kan hmalakna ropui leh chhuanawm tak tak te hi kan la report tlem hlein kan hria a. Hmalakna nei ve miah lo ang hrima Report kan dawn ngai meuh lohna bial/tualchhung chu an chungah beiseina kan nei sang viau a ni. Kha, February Issue-ah kha chuan Bial 10 chuang zetin report kan pe a, a lawmawm hle a ni. Min rawn thuam mawi hram hram teh u. Hetianga hmun hrang hrang ami ten kan hmalakna leh rawngbawlna chanchin Report mumal taka kan pek hian hmun hrang hrang ami ten kan lo bengvar phahin, ruahmanna ha zawk min neih tirin, min finchhuah thin a ni tih hi i hre reng ang. **************** Sermon/Articles : KAN DAM TLANG EM?- LH KapchhungaBazar Kohhran “Amah hmuak turin va tlan ta la, a hnenah, ‘I dam em le? I pasal a dam em? Naupang kha a dam em?’ lo va ti tawh khai.” Kan dam tlang em? Mahni theuh inzawt ta ila, Kan dam tlang em le? Lalpa kohhran hote hi kan dam tlang em? Kohhran, chhungkua, mimal nun hi Krista Isuaah hian damna, hlimna kan chang ve em? Pathian kohhranah leh a mite zingah te, chhungkuaah te kan dam lo em? Tumah vang hian ka dam lo lova, keimah hi dam lo nia ka inngaih vangte, Setana thlemna ka do zawh loh vang te hian ka dam lo a ni lo maw? Han inchhut chiang ang u hmiang. Kan dam tlang em? Tu vang nge? Midang mawhpuh lovin mahni theuh inchhut ang u. I dam em? Damlote, na tuarte, hliam tuarte chu an duh duhin an awm thei lo va, Naupang ang maia enkawl an ngai thin. Chung damlohna neite chu eng emaw chenah chhungkua ti hrehawmtu leh tihautaktu mai an nih chang te pawh a awm ve thin. Nangpawh kha han inchhut teh; Kohhran hmalakna reng rengah dam ni awm lo, Mi thusawiah damni awm hek lo, Vuivaina leh phunna tur ringawt zawng, sawisel tur ringawt ngaihtuah mi I lo ni reng em le? Chutiang mi zinga kan lo awm palh a nih chuan sim kan ngai a ni. Lalpa kohhran tan a hnawksak kan lo ni mai ang tih a hlauhawm hle a ni. Mahni mawhphurhna hlen ngai lo, kohhran ngaihsak ngai lo, kohhran hi a chhiat leh a mualpho pawisa lotu kan lo nih vaih chuan kan lo damlo nasa tawh hle a ni tih kan hriat a ngai. Kan lo damlo a nih pawhin Damna kim neitu Isua lam kan pan ang a, kan thlah thlam tur a ni lo. Thenkhat damlohna te hi chu Amah, Isua an hnaih theihna tur atan leh an inenletna tur atana natnate, hlingte leh tuarna te a pek chang a awm thin, tih kan hriat a ngai a ni. I pasal a dam em? He zawhna hi a pawimawh hle mai, Eliza’n Sunamnu a zawhna pahnihna a ni a, kan tan pawh hian a pawimawh hle a ni. A kawppui duhlai tak kha a dam leh dam loh a zawt a ni. Keini pawh hi Krista pengte kan ni a, kan dam that chuan tam takin kan rah ang a, Kohhran ho leh mite tan malsawmna kan lo ni dawn a ni. Chuti ni lova kan dam that loh chuan peng atanga sahthlak kan ni mai ang tih a hlauhawm a ni. Inpeng tawn vek kan nih avangin tumah inphatsan thei kan ni lo va, Inkhawm hunahte, hnatlan hunahte, kohhran thiltihna reng rengah te hian kan theihtawpa kan tih hlawhtlin thin hi kan tih tur, kan damtlanna tur a ni. Inkhawm kan thlahdah a, hnatlan kan thlahdah te hian Krista taksa hian a tuar thin a, Mite mithmuhah inkhawm an va thatchhe em...! tih mai te pawh kan lo awl thin a ni. Chuvang chuan, kan inenlet a ngai. Kan kawppui theuhte hi an dam em le? Kan awmdanah hian kan Pasal tur Lal Isua hi a dam ang em? I pasal a dam em? I kawppui khan i lakah enge phut a neih le? Kan dam tlang em? Naupang kha a dam em? Fanaute hi Lalpa laka kan rochan hlu tak te an ni a(Sam 127:3). Chuvang chuan, an dam leh damloh hi nu leh pate mawh a ni. Kan kohhran zingah ngei pawh hian Nu leh pa dam tha viau, (inkhawmpeih, lampeih, rawngbawl tui viau) mahse, fate erawh Pathian biakbuk thleng ngai mang lo kan lo awm em? Fate chu inkhawm turte Pathian thu zir thin turte hian kan tir lui tawh ngai em? Fate kan duat a, an thatna tur kan duh tak tak a nih chuan inkhawm turte Pathian thu awih tur tein kan hrilh thin tur a ni. “Naupang chu a kalna awm kawngah chuan zirtir ula, a puitlin hnu pawhin a thlah lovang,” Mahni fate pawh inkhawm tura tir thei lo kan awm nual mai lo’ng maw? kan inen let fe a ngai ang. Mahni chauh dam reng hian fate hi an lo dam lo ang e. I fanu, i fapa kha a dam em? Pathian thu a ngaihsak em? Inkhawm nuam ti mi a ni em? Chutiang thlengte chuan kan hre vek tur a ni. Sunday School a kal thin em? I fa khan kohhran hi nuam a ti em? Chhungkua hi a lo ni ! Ka sawi tum tak ber chu, mimal, nu leh pa leh fate kan lo dam tlan tawh chuan chhungkua kan damtlang a, Kohhran kan dam tlang ta tihna a ni, tih hi. Chhungkua pawh hi kan dam tlan a lo ngai hle a ni. Chuti a nih loh chuan zawi zawi hian kan boral ang a, he thuthlung ropui tak mai hi kan hralh daih mai ang tih a hlauhawm hle a ni. “I rawngbawl duh lo ram leh hnam chu an boral dawn si a, an In tih chhiat hlauh in an awm ang,” Isaia 60:12 thu ang hi kan ni mai ang tih a hlauhawm a ni. Chuvang chuan chhungkua pawh kan inenlet a ngai, Pathian be ho thei tawh miah lote kan lo nih tawh phei chuan insiam that kan ngai ta hle, tihna a ni. Chhung inkhawm te hi kan ngaih pawimawh a, kan tihfo hi a tul hle a ni. A tawp berah chuan chhungkua, kohhran, mimal tena kan thupui ber atan chuan, “Kei leh ka chhungte erawh hi zawngin Lalpa rawng a nia kan bawl dawn ni,” Joshua 24:15 thu hi lo ni se, mahni theuh i inen chiang ang u. Ka dam em? Kan Chhungkua kan dam tlang em le? ************* Thlaraubo Hmangaih lo Rawngbawltu- A-Hminga Sesawng. “Nang hriatna nei mi, tupawhin mlem biakna inah chaw kila an hmuh si che chuan, anni chu mi chak lo lo ni sela, an chhia leh tha hriatna chuan mlek laka inthawina thil ei a lo ngam dawn lawm ni? Tichuan i hriatna avang chuan michak lo chu a boral dawn a ni. Unaute chunga chutiang thil in tihsual a, an chhia leh tha hriatna chu a chak loh nak alaia in hliam hlauh hian Krista chungah thil tisual inni.” (I Kor. 8:10-12) Jona chu Lalpan rawngbawl tura a koh hnuah Tarsis lama tlanbo a tum a. Lalpan a umzui a, Lawng ata theh chhuahin a awm a, Nghapui kawchhungah ni thum leh zan thum Training a nei tha leh a, a piangthar ta a ni ang Lalpa hmaah lawmthu sawina nen, inthawina hlan a intiam ta a. Inti pa takin, “Thu ka tiam tawh chu ka hlen ang,” tin Lalpa hmaah a ka a ang zui ta a ni. Lalpa tirh angin Jona chu Nghapuiin a luak chhuah leh hnu chuan Ninevi khaw ropui, ni thum kal zeta zauvah chuan Lalpa thu tlangaupui turin a lut ta a. “Tun achin ni sawmliah, Ninevi hi tih boral a ni dawn e,” (3:4) tiin ni thum zet a au ta a. He sermon hi Revival Sermon tawiber-a record a ni nghe nghe. Chu a Sermon lo hretute chuan an sualna te an sim ta hlauh mai a, Revival ropui tak a lo thleng ta! An khaw lalber hovin, an rante nen lam Saiip puan sinin, vaivutah an thu a, Pathian hnenah an inchhirzia leh an rilru an lamlet a ni tih an hriattir a. Mihring leh rante reng rengin engmah an eiin an in ta lova (3:7). Pathianin an thiltih chu a hmu a, an chungah a lungawi ta a, a tum thil tha lo chu a lam let a, a ti leh ta lova (3:10). Thilmak a lo lang leh ta! An speaker mawlh mai hi. Pianthar nawn a mamawh a ni. A rawngbawlna atang hian mi nuaikhat leh singhnih (120,000) aia tam an piangthar a, lawmna reng a nei lo! Thlaraubo hmangaihna a nei hlawl lo a ni. Pathianin Ninevi a tiboral leh lote chuan a tilung nilo em em a, khawpui chhak lamah a kal chhuakin, khawpui boral lai hmuh ngei tum chuan a la thu fan fan a. Hmangaihna a va nei lo em! Thihpui khawp hialin a thin a rim a, Pathian hial pawh a chhal vel a nih chu! Jona hi chuan Israel-te hmelma khawpui leh a chhunga mite hi kang dur dur mai se, a duh zawk a ni ngei ang. Mahse, Lalpan Jentail-te pawh a lo hmangaih tho si a ni. Tuna kan hmuh ang hian, Rawngbawltute hian thlaraubo hmangaih tak tak si lo, Lalpa leh a kohhran hote zah vang chauh hian rawng kan lo bawl thin em, tih inenlet a ngai a ni. Thlaraubote hmangaihna nen rawng i bawl ang u. Amaherawhchu, Thlaraubote kan hmangaih hma hian a bo lote, kohhran huangchhunga awmsa te hi inhmangaih tlang phawt ila. Tichuan, thlaraubote hmangaihna tak tak chu a lo alh chhuak dawn a ni. A chhunga awmsate hmangaih lova, a pawnlam chauh hmangaihna chuan kohhranah boruak a tichhia a, Lalpa leh a kohhrante hnenah vuivainate a thlen a, thawhlawmah phunnawinate, thawhhonaah innghirnghonate, tanrualna kawngah inphatsannate, fianrialah tluknate a thlen thin. Hmangaihna tluantling a nih loh miau avangin. Tirhkoh Paula’n Korinth mite hnena a lehkhathawn kan hmuh ang hian rawngbawltute, thlarau mite hi kan ei leh inah te, chetzia leh incheinate thleng hian kan fimkhur a ngai a ni. Keimah avang hian ka unau a lo na em? A lo tlu em? tihte hi kan inzawt fo tur a ni. Ringlomite nen rual takin nghawngkawl ka lo bat ve fo a ni lo maw? Biakin chhunga Ringtu ka nih chuan pawnlam leh fianrialah pawh ringtu ka ni reng tur a ni. Biakin chhungah ruihtheihthil ka khawih loh chuan fianrialah pawh ka khawih dawn chuang em ni? Biakin chhungah ringawt hian ringtu ni lo ila, kan awmna hmun apiangah hian ringtu i ni zawk ang u. Tunlai khawvel thang zelah hian thalaite pawhin hma kan lo sawn ve ta... Mahse, YMA hruaitu kan nih pawhin PYD ni chungin YMA chu hruai ila, PYD ni chungin Pol. Party pawh hruai ila, PYD ni chung zelin Lo te hi neiin, kut hna thawk ila, PYD ni chungin zirlai ni ila, kan eizawnna leh kan thiltih apiangah PYD kan nihna hi dah lal ber zel ila. Hetah hian miten min fak lo mahsela, khitah, chunglama awmho khi chuan min fak ve ngei ang. Thlarau chan hi a har lo a ni maithei e, Lalpa Thlarau Thianghlim chan erawh a har; nasa taka dil a, beih tak zet a ngai tawh a ni. Hmangaihna nasa lehzual nei turin Lalpaa chhuak Thlarau Thianghlim, keimahnia khawlohnate leh bawlhhlawhnate tlengfai thei khawp hi tun atang hian Lalpa hnenah i dil thar leh ang u. ************** PYD TLANGVAL TE TAN KA TAWNGTAI DAWN- K.VanlalruatiNew Serchhip Mahni vei zawng zawng te hi i han phuh chhuahpui leh phawng phawng mai teh ang. Thlaraumite sawi ang deuhin, ka sawi loh chuan ka awm thei dawn lo tlat, a tul a ni ang. Pathian min hrilh chu ka ti ngam chiah lo nain tul ka ti ve si a, tu huat thu mah a sawi lo vang chu... Ram a changkang, hun a liam zel, zirna a pawimawh, mithiam an tangkai, tun anglaiah phei chuan lehkhathiam, zirsang mai bakah Computer pawh thiam tel ve zel a lo tul ta! Computer tel lo chuan engmah kan ti thei ta lo a ni deuh ber mai! “Lehkhathiam lo Loneimi’ ai chuan, Lo neimi rau rauah ‘B.A val’ chuan a thar hlawk zawk” an lo ti ta hial a. Engvang nge? Mithiam nge nge chuan hmangchang an hria a, a thar hlawk dan nen, a thar that duh dan tur nen lam an ngaihtuah chhuak thiam tlat a lawm. Pawng chin a, a huna seng leh mai tum lovin, fing takin a ngaihtuah hmasa a, chutah rah tha tak a seng thin zawk a ni. Tupawhin thiamna pawimawhzia chu kan hre theuh ang, mahse thiamna min petu Pathian hre rengin nise la, Lalpan In a sak loh chuan a satu chu an thawkrim thlawn mai a ni si a. Kan kohhran chhung hi i han inen teh ang. Khaw tin deuh thawah hian UPC Biakin chu a chhia chhia hi a la ni zel a, rilru chu a tang ru thin teh e. Biakin tha tak neih ve te hi a chakawm tawh ngei mai. Kohhran dang biakin tha ka va awt ngawih ngawih tihna lam ni lovin, Ram a changkang tawh a, mi changkan tak taka an chet laia che ve hleithei lova kan awm reng hi chu inenfiah a ngaiin ka hria. Mirethei te te chu kan ni, mahse tun ai hian tang tlang hlawm ila, inlungrual takin awm ila; lo phunnawi emaw, phat phat lo tum lo ila, kan phu loh hial pawh kan la nei ngei ang. “Biakin lam a ni lo, changkan lam a ni lo, Pathian thlarau thianghlim hi a pawimawh zawk,” kan lo ti pawh a ni thei e, a dik ngawt mai, Thlarau Thianghlim hi chu kan No.1 tur a ni. Mahse, miin Thlarau thianghlim a dawn a, Pathian a hmangaih tak zet chuan, A kohhran, A biakin, Amah kan biakna hmun hi mite nuihzat leh endawng, a chhia chhia ni reng atan chuan Lalpa hian a phalin ka ring lo. Miin, ‘Pathian ka hmangaih, Thlarau mi ka ni,” ti chung si hian Kohhran tana kan inseng ngam leh si lo te, Kohhran that loh deuh huna sawiselna tur hre viau si, mi dem tur hre hle si te, Kohhran tana tlai khat tak ngial pawh chawnghei tawngtai nei leh thei si lote hi kan lo ni ang e. Miten kohhran hmangaihna atanga hmalakna tur an sawi a, “A khawvel mi lutuk” lo tih ngawt te, hmalakna dang hmuh tur awm chuang si lote hi chu, kei zawng Thlaraumi ka ti thei lo. Kohhran changkan zelna tur ngaihtuah si lova, a Local te te chhungah pawh kan la lungrual leh zel te hi mawle... “Ani hi mithiam, mifel a ni a, ani hian min hruai se kohhran kan changkang chak ang” tih lam aia mahni tanghma lo hai chiam te hi a awm thin, kan inenfiah a tul ka ti ngawt mai. Thlaraumi, mifel, Pathian thimi, insumtheimi hi kohhran hruaituah chuan an tha berin ka ring tlat. Hetiang mi rau rauah pawh, mi lehkhathiam an pawimawh lehzual. Tum mumal nei lo, lehlamin an sawi hnawn deuhva lo awih; lehlam thu ngaihthlak sak nachang hrelo, a be thiam deuh tena an kaih her mai mai theih ni lo kan mamawh ta. Inti thlaraumi a, hmanlai ang a chet bual bual reng mai hi kan kalsan a hun ta! Thlarau thianghlim hnawl lova, Thlarau thianghlim pawlna avanga kan fin a hun ta! Finna kan neih tam deuh deuh theih nan Thlarau Thianghlim pawl tharna pawh kan mamawh a, kan duh reng tur a ni bawk. A dik a dik chuan, Thlarau thianghlim kan chan hi a lang tam lo tlat thin a lawm! Kohhran hi rilruin kan vei leh si lo va, mifing, mi lehkhathiam, Pathian tihmi, Pathian Thlarau Thianghlim chang rawngbawltu kan neih theih nan vawi khat tal Chawnghei tawngtai te pawh hi mi tinin nei ila ava tha dawn em! Mi thiltih demna tur hria, tha sen leh sum thawh ngaih huna phunnawi leh si hote hi Thlarau Thianghlim dawng, Lal Isua neitu dik tak kan ni thei dawn em ni? Thlarau Thianghlim hnawl hauh si lovin, a thar zel dilin, kan kohhran hi Lal isua lalna turin hmasawn i tum ang u. Pathian thuah nen, tisa leh thlarauah, Lal Isua kan hmangaihna, Thlarau Thianghlim kan channa te pawh hi pawn lam langtheiah pawh lo pas chhuak sela, indahhniam mai lovin, mite phak hi phak ve i tum ang u. Thlarau Thianghlimin huaisenna min pe se, diklo hnawl ngamin, tha leh thalo thliar thiam ila, kohhran chhung inrelbawl dan thleng hian hmasawn i tum ang u. Heng zawng zawng ka sawi hrang hrangah te hian, tute nge pawimawh ta? Tunah chuan insiam thar zung zung a har a ni thei e. Mahse, kohhran hruaitu leh kohhran hmangaih a, a rawngbawltu atan chuan Pathian tihmi, insum thei, mifing, lehkhathiam an pawimawh ta! Khawiah nge kan PYD tlangval lehkhathiam rual hote kha? In harh a hun ta! Kohhran hi in thiamna leh finna hmanga in hruai loh chuan kan sukna ngaiah kan su reng palh ang e.... Kohhran hmangaihna avangte hian zir hram hram teh u. Tuna kan Pastor rual, District leh General levela kan hruaitute hi lo pension ta se, tu ten nge an hnuchhang dawl dawn? Inngaihtuah harh a hun tak zet ta! Tuna kan Tirhkoh hote nen lam hian Pathian thu lamah chuan rintlak leh rin ngam tak tak ni mahse, pawnlam mi, midang tana lo luh chakna khawp hian kan hip thiam zel dawn em? Khawvela cheng leh khawvel mite hnena rawngbawl tur kan la nih miau avang hian khawvel thiamna lama misang pawh kan mamawh ta hle. Saptawng kawi khat maia buai tur, kohhran hruaitu kan neih reng chuan than a harsa dawn... kei chu ka duh thawh lutuk a, Kan Pastor tur pawh hian BA chin tal hi chu ni ve tawh se ka duh thin. Mifing rual ho hian min han hruai ve thiau thiau mai se, Thlaraumi an nih tho chuan kan changkang vein, insawi neuh neuh, mi khuaa rau, mahni khuaa ro tlatte hi an vang deuhin ka ring thin. Mi tlin lohna sawi vak vak lo hian inchhawmdawl dan te kan thiam ang a; kohhran chhungah kheuhbeuh deuh te an lo awm chang te, kawi thiam riaute lo kawihpui ve ngawt lova, inngeih lo leh inrem thei lote kan rem fel zung zung thiam ang a; mahni tlinlohna hre miah lo leh nihna duh bawk site pawh kan enkawl thiam tawh ang a... tiin duhthu ka lo sam ve thin a ni. Tuna kan kohhran UPC hruaitute hnuchhang dawl a, an ai la awh tur ka han thlir hian kan Thalai, a bikin PYD mipateah hian ka beiseina a la bo rih tlat! Sap val an lo kal pawha tawng min lehsak tur, Vai pachal a lo kal hun pawha tawng min lehsak tu tur hian Hruaitu chhuanawm, khawvel mite pawhina an zah tlak, hruaitu tur nei turin kan PYD tlangval te in tan a va ngai em! Tunah chuan kan Pastor senior pui pui ten an tawng min lehsak kan la ngai fo mai! Kan chan tawk leh awmdanah hian lungawi mai lovin hmasawn tum zel ila, kan PYD tlangval lehkhathiam te, la zir chho mekte pawh, kohhran hmangaihna thinlung i pu tel ang u. Mithiam rual, mi fing felin min hruai chuan kohhran chhung inrelbawl dante a felfai ang a, changkanna lamah pawh hma kan sawn ngei ang. Lehkha thiam lo hlothlo ai chuan BA val hlo thlo ten an thar hlawk zawk si chuan, Lal Isua chhandamna famkim la hrelote hnena thu hrilhdarh kawngah pawh tunai hian kan thar hlawk phah zawk ngei ang. Mifing na nana chuan, mi rilru va hneh dan a lo thiam ang a, a pawng a puia va tawngpawng beih ngawt ai chuan awmzia a neih ngei ka beisei. A tawp berah chuan kan PYD tlangval te, kohhran tana zir hram hram tur leh in thiamna pawh kohhran tana hmang turin ka ngen che u a. Keini, hmeichhe lam, nu leh pate thleng hian Pathian Thlarau Thianghlim in chan nan te, Pathian tihmi in nih zel theihnan te, kawng engkima insum thei te in nihna turin kan lo tawngtaipui dawn che u a nia. Lalpan thiamna leh huaisenna pawh pe zel che u rawh se. Lalpan mal min sawnsak lul rawh se. **************** 2007 PYD AW THLIRLETNA Kumin chu kumdanga kan la tih ngai loh deuh, nikum chhunga kan chanchinbu thlirletna ang rengin tlem azawng tarlan chakawm deuh deuhte i han zep ve teh ang. Mi thahnemngai tak tak ten Article/Sermon leh Chanchinthar te, Hmalakna te leh kawng hrang hranga kan hriat awm deuh deuhte rawn thawhin, midangin tlawmngaih chhuah tak meuh meuhin a semdarh hna an lo thawk ve bawk a, in chungah hian kan va lawm tehlul em! Chutah anni inpekna mai a la tawk lova, Lawmman chu sawi loh, manchawi zawka min thawhpuitu leh kan tum bulpui ber- tlawmngaih chhuaha min lo laksaktute inepkna hi kan fak lo thei lova, an ni hian full support min pe tak meuh meuh a ni. Kan sawi tui hmain lo duhtawk leh rih phawt ila. Heng kan mi sawite bakah hian phur tak leh thahnemngai taka min finchhuahtute, min fakseltute leh rawtna hrang hrang min pe thintu mi tam tak kan neih avang te pawhin lawmthu sawi tur kan la ngah hle... kan sawi mawlh mawlh e. Awle, kumdanga kan lo tih tawh angin kum 2007-a PYDAW-a thuziak tha thlanna neih a ni a. A tha thlan chhuahte kan tarlan hmain, kan thu chhuah zawng zawng leh a ziaktute kha i lo tarlang hmasa leh lawk teh ang; kan miropuite an ni tlat si a. Hetiangin :- 2007 PYD AW-a Sermob/Article leh a ziaktute : January : 1. Hmangaihnaah ka uai zo ta e - R.Vanlalnela, Khawzawl venglai 2. Pianna - Ahminga, Sesawng 3. Tawngtaina nun - K.Lalchhuanmawii, Sakawrdai Vengpui 4. Mi naran diary - Lalzarzova Fanai, Chhiahtlang Vengpui February : 1. Krista Rawngbawltu - V.Lalchhuanmawia, Sakawrdai Vengpui 2. Harsatna - Upa C.Mankunga, Dinthar Khawzawl 3. Ka pasal duhzawng - Ngursailovi, Thingsulthliah 4. Thianghlimna - Lalrambuatsaiha Fimate, Vaitin Kawnveng March : 1. Eitu ata Ei tur - Evan.Lianthangvunga, Bungkawn Aizawl 2. Kohhrante hmalam panin - Dr.R.Lalfakzuala, Bethlehem 3. Kan Chanchin - Evan.Kenneth Sawmtea Sailo, Umrinjah April : 1. Ka sual lungngaihthlak a kalpui - R.Sangthanga, Khatla 2. Pathian chenna tlakin - H.Zothanpari, Serchhip Biakinpui May : 1. Chanchintha - Rosanglura Chongthu, Armed Veng South 2. Sakhaw dang hi ka thik thin - Upa R.Lalhmangaihzuala, Bawngkawn 3. Damlai Ni - Upa C.Mankunga, Dinthar veng Khawzawl June : 1. PYD AW kalsiam - JH. Zahluna, GS NEI PYD 2. Thisen far tawp thlengin - Upa R.Lalhmangaihzuala Ed.Bd. 3. PYD AW hi - C.Lalfakzuala Member PYDAW Board July : 1. Maichamah Ruihhlo a awm - Rev.Rosanga Kawlni 2. Phelsep Thlawkthei - Lth. Hnamte August : 1. Incheina - Rev.R.Lalthanzuala 2. Thalaite leh tunlai khawvel - Mawia Fanai, Hermon 3. Thlarau mi ka hmu ve a - Rosanglura Chongthu, Armed Veng S. 4. UPCI Khawvel - Rev.K.Darsailova September : 1. Lal Isua i sawm ve dawn em? - H.Vanlalsanglura, Chhiahtlang Vengpui 2. Krista Rilru - Manuna, Chhiahtlang Vengpui 3. Krista hi eng hmelpuin nge i lantir ve le? - Evan.T.Lalbiakliana, Hnahlan 4. Danger, Dangerous - Lalnunsanga Sailo, Champhai 5. I harhthar ang u - Lalnuntluangfela, Dist.Hqrs. October : 1. Thianghlimna - C.Lianhnuna, Murlen 2. Harhtharlehna - H.Vanlalsanglura, Chhiahtlang Vengpui 3. PYD AW hi - J.Lalhmingsanga, Darlawn. November : 1. A PYD chhan - Sangtea, Khawhai. 2. Thu leh Hla Kutpui Hmun thianghlimah - Laldanmawia, Bethlehem. 3. Mi Inah i leng thin em? - KVL Ruatmawia, N.Vanlaiphai. 4. Krista Sipaiah ka insiam - Lalchungnunga (LCA), Zohmun 5. PYD te leh zuk leh hmuam - Lalngaihzuali, Ramhlun Vengthar. December : 1. Adama thlaha tihdam hi - Evan.K.Lalzarliana, Ramhlun Vengthar 2. Christmas Hlahril - C.Lalfakzuala, College Veng. 3. PYD leh Incheina - Muantea, Thuampui. 4. Huaisen Lawmman - J.C.Vanlalhmuaka, Khawzawl. 5. PYD leh Sex - LH Hmar, (Chhiahtlang Vengpui.) Tichuan, heng thuziak hrang hrangte atang hian a tha ber thlan chhuah a lo ngai ta si a, tlawmngaih chhuah bawkin Republic, Aizawl lama kan rawngbawlpui Unaupa Lalnunzira’n a thiam dan angin min endik sak ta a. Hetiang hi an ‘Rank’ a pek dan chu a ni :- 1. Pianna - Ahminga (JH Lalhminghlua) Sesawng. 2. Thalaite leh tunlai khawvel - Mawia Fanai, Hermon. 3. Kohhrante hmalam panin - Dr.R.Lalfakzuala, Bethlehem. 4. Ka Pasal duhzawng -Ngursailovi, Thingsulthliah 5. Sakhaw dang hi ka thik thin -R.Lalhmangaihzuala, Bawngkawn 6. PYD AW hi - J.Lalhmingsanga, Darlawn 7. Thianghlimna - Lalrambuatsaiha Fimate, Vaitin 8. Thianghlimna - C.Lianhnuna, Murlen 9. Thlaraumi ka hmu ve a - Rosanglura Chongthu, AVS 9. Mi Inah i leng thin em ? - KVL Ruatmawia, N.Vanlaiphai 9. PYD hmeichhe dinhmun - LH Hmar (H.Lalhmingmawii) 10. PYD leh SEX - LH Hmar (H.Lalhmingmawii) Hengte hi a tha zuala kan han thlan chhuah tak te chu an ni a. (A endiknaah hian a ziaktute hming thup ve a ni). Thuziak leh zel tur tena kan hriat atan leh changkanna lam kan pan beiseina avangin tehfunga kan lo hman thin piah lama Unaupa Zira tehfung hman leh a ‘comment’-na thu hi tlemazawng i han tarlang teh ang: Endiktu Tehfung-te : 1. Subject matters (Thu ken leh tum) : Hei hian a thupui thlan a sawifiah that tawk leh tawk a kawk. 2. Literary flow (Thu luan dan) : Hei hian tawngkau chheh dik leh dik loh bakah thu inlalawn rem tha a nih leh nih loh a kawk. 3. Creativity : Hei hian a ziaktu finna (intellectual) te, thiamna (talent) te, thil ngaihtuah chhuak thiam tak a nih leh nih loh a kawk. 4. Theological impression : Hei hi kohhran article a nih avangin thlirna hmanruaah hman a ni a. A ziaktuin Pathian thu lamah eng angin nge mi kaihhruai a tum tih te, a theological thought kha a biblical em? tih te a kawk. 5. Universality : Hei hi “Literary scope” pawh a tih theih ang a, Article huap chin kha eng ang nge? Kohhran a huap kim em? tih te a kawk a. Entirnan: thenkhat thuziak chu, an lawina kohhran boruak deuh hlir tarlanna a ni thei a, chu a Universal lo a ni. Tun tum bika endiknaah hian hengte hi endikna atan hman a ni a. Thu chher (coin word) kan tih hi chu Prose a nih avangin phut a ni vak ngai lova, Poetry lamah hi chuan hla phuahtuin hlathu a rawn chher thar chuan a hman thiam dan a zirin nghaihhlut a hlawh viau thung. Hetiang zulzui deuh hian tehfung neia endik thin anih avangin Article ziaktute pawhin kan lo inbuatsaih nana tangkai a nih ngei kan beisei e. ENDIKTU COMMENTS : “Kum 2007 chhunga PYD AW chhuak article te hi phak tawka ngunin ka’n bih ve a, a thatna lai leh that lohna lai tam tak sawi tur a awm thei ang a. Pakhat ka’n tarlan duh chu hetiang tak maia PYD te zingah PYD members nunphung leh kohhranho nunphung kan vei hi a lawmawm ka ti ngawt mai. Article 41 chhuak zingah pahnih khat tih loh hi chu nunphung bihchianna leh duh khawp lohna leh infuihna hlir a ni a. Bible thu hmehbel remchang thei tur hmehbela nunphung sawiselna leh fuihna deuh vek a ni. “Kawng lehlamah chuan hetianga nunphung vei leh infuihna hi a that viau rualin Kohhran leh Chanchinbu/Magazine quality a tihniam ve thei tho bawk. Chuvangin kum 2007 PYD article chhuak atanga thlir chuan, “UPC kohhran leh thalaite chu an la puitling lo deuh a nih hi” a tih theih a ni. Thil tha lama infuihnaa kan ngaih laiin mahni mawng hlim kan ni thei bawk. “PYD Aw-a article te hi published a nih tawh avangin written record a ni a, kan thu ziak te hi ngun taka kan ngaihtuah a ngai a, chanchinbu lar leh nakin hnu pawha râwn tling a nih theih nan Theological approach ni thei sela. Pathian thu bihchianna (Theological Analysis) lam te, Pathian thu chîkna (Theological Thought) min pe thei Article te ni thei se a duhawm hle. Tuna kan article neihte hi chu a Theological vak lova, thu tha tluang tlam, kohhran nunphung sawiselna leh fuihna a la ni deuh ber hlawm. Thalaite hian Pathian thu hi ngun taka chhutin, chuta kan thil hmuh leh hriat, zir chhuahte chu taima taka chhuahin tan i la thar sauh sauh ang u.” Kumdanga min endiksaktute pawhin an ngaihdan leh hmuhdan te min hrilh ve hlawm nain, chanchinbuah hian kan la tarlan sak ngai lova. Hengte hi kan tangkai beiseiin kan rawn tilang a ni; tihfo atan pawh a that a rinawm e. ‘Chuan.... hei hi Article of the Year bik a ni a, tarlan ang hian Bro.JH Lalhminghlua, Sesawng PYD Secretary hian lawmman a han hui ta phawt a. Hei bakah hian PYD AW min sem chhuahsak tam bertu chu Bro.R.Lalramsanga Bethlehem a ni a, copy 73 thla tin a sem ral thin a ni. Tin, PYD AW man pe tlak hmasaber hi Bro.Zolianmawia Palsang niin, dt.12.3.07 khan a tlak a, Report pe tha ber erawh Bro.H.Vanlalsanglura Chhiahtlang niin, vawi 7 report a rawn pe thei a ni. An chungah kan lawm em em vek a ni. Awle, han sawi zawm ta zel ila. PYD AW enkawltute tho hian nikum 2007 chhunga Kohhran Chanchinbu hrang hrang (kan District chhung bik ami) te zinga a tha thlan chhuah hna a thawk tel nghal a. Heng a hnuaia kan tarlan ang hian Chanchinbu endik tura lo lut leh an Rank kan han siam dan chu a ni e :- 1. THALAI KANTU - Republic Local PYD 2. JUNIPER - Bethlehem Local PYD 3. JEHOVA SHALOM - Thuampui Local PYD 4. PENTECOSTAL TIMES - Serchhip Biakinpui Local PYD 5. ONENESS - Serchhip Dinthar Local PYD 6. OLIVE - Bazar Local PYD 7. PENTECOSTAL AW - Khawzawl Vengthar Local PYD 8. RAWNGBAWLTU - Salem Local PYD 9. THALAI KANTU - Ramhlun Vengthar Local PYD Heng chanchinbu rawn thehluttu zawng zawngte hnenah hian lawmman (Computer tana tangkai tur) pek vek an ni a. ************** DISTRICT CONFERENCE 2008 Aizawl East District UPC chuan kum 2008 Dist. Conference chu March ni 6-9 khan Bazar Bial, Electric Veng YMA Hall, Aizawl-ah hlim takin a hmang a. Khawmpui palai an kal tha vak lo nachungin Pathiannia Revival programme-ah erawh Hall khat dawn lai an kalkhawm thei a ni. Nilaithawhtan zanah Rev.R.Hrangvunga Dist.Supdt. hluiin Conf. hi a hawng a. Rev.Ellic Hnehzova Gen.Treasurer (NEI)-in Pathian thu a sawi thung a ni. Zirtawp zing (Dar 6:30-10:00)-ah District PYD Conference chu Bazar Biakinah neih a ni a. Report te ngaithlain, Rorelna hlimawm tak hman a ni bawk. Chhun lamah District-pui Conf. chhunzawmin, Department hrang hrang report Hall-ah ngaihthlak a ni leh a. Inrinniah Rorelna leh District hruaitu thlanna hun hman a ni. Zirtawp zan atangin Pathianni zan thlengin Sis.Pc Hrangkhumi B/W, Rev.C.Lianchama N.Mz. Dist. Supdt., Rev.R.Lalrinsanga Gen. Supdt., Rev.Lalrumliana Sagain Dist. leh Rev.R.Lalhawia Dist.Supdt. thlan thar ten Pathian thu an sawi a ni. Statistic Report leh a behbawm chu tun hunah chuan kan tarlang rih lo mai ang a, remchangah kan la tarlang zeuh zeuh mai a ni ang chu. Khawmpui rorel te erawh hetiangin :- 1. Kum 2010-a District Conference neihna hmun atan Zemabawk bial ruat a ni. (2009-ah chuan Bawngkawn bialah nghah a lo ni tawh) 2. Kan district hian Nilai zan thupui buatsaiha zirho ve tawh nise, tih a ni a. Thupuibu leh a ziaktu tur chu Dist. Board kutah dah a ni. 3. NEI huapa inang tlanga kan hman turin Serh leh sang kaihhruainabu siam nise, tih chu General lama thlen turin tih a ni. 4. Financial Campaign neih a nih leh chuan June thla ral hma lama neih ni tawh se, tih a ni. 5. NEI pumpui hi centralisation-a kal nise, tih a ni a. General Conf.-ah thlen leh a ni ang. 6. Mautam tam tuarte hi Kohhran hian tanpui ve nise, tih a ni a. Gen. Conf.-ah thlen tur bawk a ni. 7. Licence Fellowship Card (Pastor, Tirhkoh leh Bible Woman)-ah hian a neitu thlalak chuantir nise, tih a ni a. Gen.Conf.-ah thlen tur. 8. NEI Constitution-in Department Office Bearer mi 3 neih theih, a tih hi a aia tam neih theih, tih ni rawh se, tih a ni a. Gen. Conf.-ah thlen tur a ni bawk. (District Board pawh neih nghal a ni a. An thurelte erawh kan tarlang hman ta rih lo). ************* DIST. PYD CONFERENCE Dt.7.03.2008 (Zirtawp) zing dar 6:30 khan Aizawl East District PYD Conference chu Bazar Biakinah neih a ni a. Hetah hian zingkar a ni nain Rorel palai 71 kan kal thei a ni. Tin, Dist. Supdt. incharge Rev.R.Lalthanzuala’n rorel hi min telpuiin, Bialtu Pastor 7 bakah General PYD OB 3 te pawh an lo tel thei a. Rorel zawhah Ruai kilho nghal a ni. Rorel tan hmain Dist. Sub-comtt. hrang hrang : Music & Sound, Fund-raising, Kumpuan, Pentecostal Choir, PYD AW te atangin report hlimawm tak tak ngaihthlak a ni. Tin, District Financial Report ngaihthlak a ni a, Kum 2007 chhungin Sum lut zawng zawng- Rs.378,523/- atangin Rs.253,404/- hmanral a nih thu leh Rs.125,110/- kan la neih thu ngaihthlak a ni a, kan hlim hle. Conf. thu passed-te hetiangin :- 1. All India Youth Meet, kum 2010 ral hmain neih nise. 2. NEI PYD ten tun aia zirna lama hma kan sawn theih nan General PYD atangin hma lak nise. 3. District PYD hian Mautam tam tuarte chhawmdawlna pek ve nise. 4. Kum 2008-a Thu leh Hla Kutpui neih tur chungchang rel nawn leh a ni a, Dist. Board kutah dah a ni. DIST. PYD BOARD THUREL Kumdanga tih thin angin, Dist. PYD pawhin Conference rorel te bawhzui leh tuldangte relin District Board chu Dt.8.3.2008 (Inrinni) zing karah neih leh a ni a. Upa JH Rozawna Bazar Bial PYD leh Dist. Fund-raising Comtt.-a Vice President hna chelh mekin a chenna Inah Board memberte hi chawhlui a lo buatsaih sak a ni. Rorel tlangpui te :- 1. PYD Logo kan hman mek hi siamthat a, design dang siam nise, tih chu General PYD-a thlen tura tih a ni. 2. NEI PYD ten zirna lama hma kan sawn theihna tura Conf. thurel chu Gen. PYD Conf. Agenda-a move dan turte sawiho a ni. 3. Mautam Tam ruarte chhawmdawl nise, tih Conf.-in a passed chu, Bial tinin theih ang tawk tawka thawhkhawm nise, Rs.20,000/- aia tlem lo tlin tum nise la, hemi atan hian Dist. PYD pawhin Rs.5,000/- thleng pawh tum ve nise, tih a ni a. Pek khawm hun atan April 2008 ral hma ruat nghal a ni. 4. Kum 2007 Dist. PYD Conference-in a lo passed tawh 2008-a Thu leh Hla Kutpui chu hman a nih ngei theih nan Organising comtt. hetiang hian din thar leh a ni : Chairman : Bro.K.Lalmuansanga Secretary : Bro.David R.MS Tluanga Treasurer : Bro.R.Vanlalropeka *Comittee member chu anmahni lo ruat tura tih a ni. 5. District PYD Sub-Committee hrang hrang hruaitu hetiang hian ruat thar an ni:- 1)Fund-raising Committee : Chairman : Dr.R.Lalfakzuala Vice Chairman : Upa JH Rozawna Secretary : Bro.James Thanghmingmawia Asst. Secy. : Bro.H.Lalhotuliana Treasurer : Sis. F.Lalthanchhungi 2) PYD AW & CHANCHINBU THA THLANG : Chairman/Editor : Evan.Hr.Lalrindika Secretary : Bro.K.Lalhmunsanga Treasurer/Cir.Manager : Sis.H.Lallianzauvi 3) KUMPUAN : Chairman : Evan.F.Malsawmtluanga Secretary : Upa Lalchhanhima Treasurer : Sis.Lalbiaknungi 4) MUSIC & SOUND : Chairman : Evan.Laltlanhlua Hnamte Secretary : Bro.Lalhmunsiama Sailo Treasurer : Bro.H.Lalhumhima 5) PENTECOSTAL CHOIR : Chairman : Evan.H.Lalropuia Secretary : Bro.H.Lallungtiawia Treasurer : Sis.Lalhmangaihzuali (Mimi) (Hruaitu hlui leh thar charge inhlan chu Kohhranpui Board zawh lamah la inhriattir tur a ni a, member tur pawh charge inhlan hunah hian an ruat mai rin a ni.) ********** Kan chanchin (Bial/Local Reports) : RABUNG BIAL Ni 25-27 Jan. 2008 hmang khan Rabungah Bial PYD Conference kan hmang a, Palai pawh khaw chhe hnuaiah hrehawm pawisa lovin mi 60 vel bawr kan kal thei a. Pathian thlarau lamah pawh kan hlawk tlang hle a, kan hlim hle bawk a ni. Ni.26 Jan. 2008 nilengin rorelna kan nei a, rorel palai pawh kan kal tha hle a. Hetiang hi kan rorel tlangpui a ni :- 1. Kum 2009 Conference chu Murlen-ah nghah a ni a, Dt.23-25 Jan. 2008-ah neih tur a ni. 2. Pastor Quarter sak nan Rs.3000/- Target siam a ni. 3. Fellowship-naa hman theih Hlabu tha tak, Solfa tela siam turin District-a ngen tum a ni. 4. Bial PYD bul tuma Crusade, Hliappui hmuna nei tura ruahman a ni. 5. Kum 2009 Bial Conference Thupui atan “Thuthlung kha rawn pawisa ang che” Sam 74:20 chu hman a ni. - C.Lianhnuna Secretary, Bial PYD KHAWLIAN BIAL Dt. 25-28 Jan. 2008 hmangin Khawlian hmunah Bial PYD Conference hlawhtling takin kan hmang a. Speaker atan kan bialtu pastor VL Hnemtluanga hmangin Pathian thuchah kan ngaithla thin a ni. Inrinni nilengin rorel a ni a, kum 2008 chhunga hmalakna tur pawimawh tak tak passed a ni. Sunday zing atanga chawhnu inkhawmah Competition neih thin a ni a. Item hrang hrang kan neih zingah a bik takin Short Sermon kan neih hian hma kan sawn phahin, thlarau lam boruak pawh a nuam thei hle. Thawhtanni pawh taksa ruai nena la chhunzawm zel a ni a. Thawhlehni hian kam lo tak leh inthlahlel takin kan inthlahliam ta a ni. -HK Laltlinsanga President, Bial PYD. KHAWLIAN PYD KUMPUAN : Khawlian Local PYD Kumpuan sub-comtt. chuan Thla tina Thuthlung puan chhuah chu, Pathian kaihhruaina zarah hlawhtling takin kan nei ve zel a. Feb.28-3 Mar. 2008-a kan hun hmanah chuan Bialtu Pastor V.L.Hnemtluanga leh Oneness Revival Team te hmangin Thuthlung puanchhuah a ni. Lalpa Thuthlung puan chhuah avang hian Kohhran hoten thlarauva chakna thar leh inlungrualna min neih tir a, kan hlawkpui hle. Tlang tina kan unaute pawhin Thuthlung la hre ngailo ten an hriat zel theih nan i tawngtaipui reng ang u. - Lalrawngbawla Secretary, Local Kumpuan Sub.comtt. ***************** SILVER JUBILEE LAWM Dt.11-13.1.2008 khan Bethlehem Bial PYD te chuan kum 25 kan tlinna Silver Jubilee chu kan theih anga ropuiin kan lawm ve a, Bial chhung kohhrante leh min hlutpuitu hmun hrang hrang atanga lokal te chungah pawh kan lawm hle a ni. Dt.11.1.08 khan Aizawl Civil Hospital-a dah turin PYD member ten thisen unit 35 kan pe a, kan lawm hle bawk. Tin, zan lamah Bethlehem Biakinah Song Festival hman a ni leh a. Hetah hian Bethlehem Bial PYD Secretary hmasaber Upa K.Hranglawta’n Jubilee Mei min det a, Rev.HL Thakunga’n Silver Jubilee Souvenir “HRINGNUN” chu min tlangzarh sak thung. He Festivalah hian Bial PYD zaipawl leh bial chhunga Group zaithiam tak tak te, Bial pawn atanga kan sawmbik ten Pathian fakna hla an sa hlawm a, kan hlimpui hle a ni. Dt.12.1.08 chhunah Session hniha hun hman a ni a, Session khatnaah Bible Exam, Evan.Lalramzauva buatsaih leh programme tha tak tak hmangin hun hman a ni a. Session hnihnaah hian Quiz (GK & Kohhran History) Bro.Lalfelkima buatsaih te, “PYD te hmathlir” tih Evan.JH Zahluna ziak hmanga Thupui zirhona neih a ni leh a, kan hlawk tlang hle. Tlai dar 3 atangin Jubilee ruai tui tak kilho a ni. Zan atangin Revival programe hman a ni a. Malzai leh Zaipawl (Choir & Group)-in Fakna hlain min awi reng bawk a, Bial PYD President Dr.Lalfakzuala hnen atangin ‘Jubilee pawimawh’ ngaihthlak a ni. Dt.13.1.2008 (Pathianni) hi Jubilee ni tak zawk chu a ni a. Zing inkhawm luh hmain Bethlehem Biakin kawta Jubilee Lungphun chu bialtu pastor Rev.HL Thakunga’n a haihawng (unveil) a, Bial zaipawl ten thiam taka Fakna hla sa zuiin, Biakinah inkhawm neih chunzawm nghal a ni. Bial PYD Hruaitu hlui lokal zawng zawngte hnenah Chawimawina hlan a ni a, Rev.R.Lalhawia’n “I pianna ramah kir leh rawh” tih thupui hmanga a sawi chu ngaihthlak a khamawm lo hle. Pathianni chhunah Bethlehem bial pastor lo ni tawh, tuna N.Mizoram Dist.-a awm ta, Rev.H.Vantluanga hnen atangin “Thuthlung kha rawn pawisa ang che” tih thupui hmangin sermon ngaihthlak a ni leh a, kan hlawk tlang hle. Pathianni zanah chuan AED PYD President Rev.Rosanga Kawlni hnen atangin “Puitlin lam i pan ang u” tih thupui hmangin thu a sawi ve thung a. Inkhawm hi zan dar 9:30 velah kham lo takin kan tin ta a ni. Kan hun hman chhung zawngin Pathian thlarau chenchilhna kan dawng a, thlarau lam boruak pawh a tha thei hle. Tin, Chaltlang Bial leh Republic Bial leh District PYD hruaitu engemaw zatin Jubilee hi min hmanpui a, kan lawm hle. Heng kan hun hman zawng zawng hlawhtlinna tur hian Bial PYD-in Jubilee sub-comtt. a din a, anni thawhrimnaah hian kan lawm em em a ni. - JH. Ramherliana Secretary, Bial PYD |